Трговците ја кројат мерката за поевтинувње, додека Мицкоски и Дурмиши не се во земјата

Добивај вести на Viber

Новоформираната трговска комора, која се здружи специјално за да повика на итна средба со Владата и барем засега да не се донесе мерката за ограничување на бруто профитните маржи до 10 отсто на одредени прехранбени продукти, има нов свој предлог до надлежните.

Според информациите на Телма, трговците предложиле листа од 140 производи за поевтинување чии маржи ќе се ограничат од 3 до 15 отсто, но од 22 март до 22 април, со што би се покриле верските празници.

Владата требаше да донесе одлука преку Министерството за економија уште минатиот вторник за ограничување на маржата на 10 отсто за 70 продукти, но и на хигиенски производи и бебешка храна. Мерката требаше да започне веднаш и да трае до крајот на април. Во меѓувреме имаше неколку средби со трговците, а одлуката не се донесе.

Утре се очекува одговор од Владата, но сепак министерот за економија Бесар Дурмиши е во Катар, а премиерот Христијан Мицкоски од Минхен треба да замине за Вашингтон.

„Иако Владата уште во вторникот најави замрзнувањето на маржите, оваа недела измина а одлуката не е донесена. Очигледно, интересот на бизнис елитата за владата е поважен од тоа да ги заштити граѓаните.

Како одговорна опозиција, СДСМ предложи сеопфатна економска стратегија – сет на 7 мерки преточени во закони кои ќе имаат силен и брз ефект врз стандардот на граѓаните“, веќе реагираа од опозицијата.