Tрговците не ја злоупотребија можноста: Нема ценовен шок по либерализација на пазарот на нафта и нафтени деривати

Добивај вести на Viber

Цените што нафтените компании ги дефинираа на пазарот, односно на нивните бензински пумпи се исти или слични какви што би биле и по методологијата што до скоро се применуваше. Што значи дека тие направија еден коректен пристап кон пазарот и не ги зголемија цените, иако пазарот во овој период е либерален, се до донесувањето на методологијата. Ова е оценката на вицепремиерот Кочо Анѓушев.

Засега времената либерализација на пазарот на нафта и нафтени деривати поради правниот вакуум предизвикан со не потпишувањето на измените на Законот за енергетика од поранешниот претседател Ѓорге Иванов не предизвика ценовен шок за купувачите.

Навреме не можеше да биде донесена новата методологија по која Регулаторната комисија за енергетика (РКЕ) треба да ги определува цените па трговците не ја злоупотребија можноста што им се пружи и ги намалија малопродажните цени на бензините за еден денар по литар, а ја покачија цената на дизелот за половина денар и на екстра лесното масло за домаќинствата за два денара по литар.

Имено, од вчера бензинот ЕУРОСУПЕР БС-95 се продава по цена од 71 денари за литар, ЕУРОСУПЕР БС-98 чини 73,  ЕУРОДИЗЕЛ (Д-Е V) 64, био-дизелот 65, а Екстра лесното масло за домаќинство (ЕЛ-1) 54 денари за литар.

Трговците со нафта и нафтени деривати постапија коректно што не ги зголемија малопродажните цени на бензинските пумпи, порача вчера вицепремиерот за економски прашања Кочо Анѓушев.

Според него, добро е што трговците ги правеле пресметките по старата методологија, иако во моментов има либерализиран пазар. Тој сепак најави дека државата будно ќе ги следи состојбите и ќе спречи било каква можност за поголемо зголемување на цените на горивата.