Три милиони денари главна награда на „Мој ДДВ“

Добивај вести на Viber

Од 15 декември започнува наградната игра „Мој ДДВ, моја награда“ со скенирањето на фискалните сметки, а наградниот фонд че изнесува половина милион евра и ќе има дневни, месечни и две главни награди од по 3 милиони денари, кои ќе се доделат во март и декември 2020-та година. 

Министерката за финансии Нина Ангеловска денеска рече дека при скенирањето на фискалната сметка, без оглед на износот, корисниците ќе добијат порака дали таа е добитна или не. 

- Игрите како такви се користат од сите влади не само од владите од земјите во развој, не само за сива економија, туку се користат за да се промени одредена навика и одредено однесување и да се стимулира одредена активност. Во однос на наградниот фонд кој што беше споделен, истиот фонд ќе биде достапен до сите граѓани кои ќе имаат шанса да добијат дневна, месечна награда и секако знаеме дека сите сакаме наградни игри. Тоа е начин да ни помогнат во адресирање на сивата економија, најави Ангеловска.

Попрецизно, во текот на 12-те месеци на времетраење на наградната игра ќе се доделуваат:две главни премии од по 50.000 евра, месечни награди – 12 кола по 15 награди од по 100.000 денари, дневни награди – секој ден доделување на 4 награди по 1 000 денари, 3 награди по 2 000 денари и 3 награди по 3 000 денари.

- Наградната игра ќе влијае и на подигнување на даночниот морал и нивото на финансиска едукација преку пораките кои ќе ги добивате при секое скенирање на сметка, додаде министерката.

Инаку наградната игра „Мој ДДВ, моја наградата“, ќе ја спроведува фирмата „Мекен“, кој во следните 12 месеци ќе ја реализира маркетинг стратегијата, предлогот на извлекувањата и прогласување на победниците за наградната игра, откако победи на Хакатонот.