Тројцата портпароли на ВМРО-ДПМНЕ предложени за членови на Управни одбори во ЈСП и Водовод-Скопје
Објавено во: Македонија 23 Декември, 2021
Тројцата портпароли на ВМРО-ДПМНЕ се предложени од Град Скопје да бидат членови на Управните одбори на најголемите градски претпријатија - ЈСП и Водовод и канализација - Скопје.
Наум Стоилковски е предложен за член на UO на Јавен сообраќаен превоз - Скопје. додека Димче Арсовски и Марија Митева се предложени да бидат дел од УО на „Водовод и канализација“, објави СДК.
Станува збор за Предлог-одлуката за именување на нови членови, предложена од група советници, и која треба да се гласа на седницата на Советот на Град Скопје в среда.
Во Младинскиот културен центар како членови на УО се предлагаат актерката и поранешна директорка на Театар Комедија, Јелена Жугиќ, како и раперот од „Пука козметика“ и кандидат за советник на Град Скопје од Левица Жарко Масларковски.