Трошења на министерствата: Расходите за плати, стоки и услуги „пуштени на најјако“
Објавено во: Економија 05 Август, 2019
Капиталните инвестиции им се слаба страна, но на што најмногу ги трошат своите буџети, министерствата и државните институции. До мај, до кога има официјална статистика за приходите и за расходите по буџетски корисници, фантастични 95 отсто од сите расходи им се за тековни трошења. Според податоците од Министерството за финансии заклучно со мај вкупните расходи на буџетот изнесуваат безмалку 85 милијарди денари, што е за речиси седум отсто повеќе од лани.
„Во структурата на реализираните вкупни расходи, тековните расходи во износ од 82 милијарди денари учествуваа со 95,8 отсто и се зголемени за 6,9 проценти во однос на 2018 година. Платите и надоместоците се реализирани во износ од 11,3 милијарди денари што претставува зголемување за 3,9 отсто во однос на претходната година, велат од Министерството за финансии.
Расходите за стоки и услуги изнесуваа 6,9 милјарди денари и споредено со 2018 година забележаа зголемување од 15,6 отсто. Ако се анализира по буџетски корисници односно по министерства, речиси кај сите освен кај МИнистерството за транспорт и врски, тековните трансфери или тие за плати и за стоки и услуги се драстично поголеми од релизираните капиталниинвестиции.
Така во периодот од јануари до мај Министерството за внатрешни работи потрошило 4.7милијарди денари, а најзначајна расходна ставка претставуваат платите и надоместоци за што е потршено дури 68 отсто или речиси 3, 2 милијарди денари. Втора најзначајна ставка се стоки и услуги со учество од 21 отсто.
Министерството за одбрана во првите пет месеци од 2019 година има вкупни расходи од 2,6 милијарди денари, а платите и надоместоците имаат најголемо учество со 60 проценти. Стоките и услугите учествуваат со 24,7 проценти во вкупните расходи, за што во анализираниот период се потрошени 651 милион денари.
Но, Министерството за транспорт и врски во тој период реализирало средства во износ од 1,2 милијарди денари, а реализацијата на капиталните расходи изнесува 12,2 од предвиденото (766 милиони денари), а учествуваат со 64,5 проценти во вкупните расходи на овој буџетски корисник.
Премиерот Зоран заев кој јаврши и функцијата министер за финансии најави ребаланс на буџетот за после септември.
А.Т.