Добивај вести на Viber
Инспекторот за животна средина кој вчера беше уапсен, доби кривична пријава за поткуп, а МВР денеска обелодени дека примил мито од 200 евра. Од сопственик во Кичево побарал и ги добил овие пари, а кривино ќе се гони и негов помагател од тетовското село Фалише.
„ОВР Кичево поднесе кривична пријава против А.Р.(51) од Тетово, државен инспектор за животна средина, поради постоење основи на сомнение за сторено кривично дело „примање поткуп“ и против С.А.(40) од тетовското село Фалише поради постоење основи на сомнение за сторено кривично дело „помагање“. На 22.04.2021, А.Р., вршејќи службена должност во Кичево, од сопственик на правен субјект во Кичево, побарал и добил 200 евра“, објави МВР.
Државниот инспекторат за животна средина вчера го осуди секој обид на инспекторите да остварат материјална корист од прикривање на законски прекршувања на загадувачите.
„Денешното апсење на државен инспектор за животна средина заради сомневање дека примил поткуп е доказ дека сме решени да се пресметаме со корупцијата и да ја вратиме довербата во институциите. Очекуваме надлежните органи детално да го истражат случајот со цел негово решавање во согласност со законот. Нема да дозволиме злоупотреби на службената положба. Одлучни сме да застанеме на патот на корупцијата која е составен дел на криминалот во животната средина“, соопшти вчера инспекторатот.