Ученик истепал наставник во гостиварско Симница
Објавено во: Македонија 21 Април, 2017
Петнаесетгодишен ученик нападнал наставник во основното училиште „Исмаил Ќемали“ во гостиварското село Симница и му нанел повреди на главата.
Од СВР Тетово информираат дека настанот во полиција го пријавил вработен во училиштетото вчера утрото околу 8 часот.
„Петнаесетгодишен ученик од ова училиште физички го нападнал наставникот Ш.К.(62) од ова село. На нападот му претходела куса вербална расправија поради тоа што ученикот одбивал да влезе во училницата. Малолетникот се нафрлил на наставникот и почнал да го удира со клоци и тупаници по главата и телото, нанесувајќи му видливи повреди на левата страна од главата, односно расекотина и оток на челото“ - изјави Марјан Јосифоски портпарол на СВР Тетово.
Вработен во училиштето го спречил малолетникот да го тепа наставникот, а повредениот наставник побарал лекарска помош.
По пријавувањето на случајот, ученикот во присуство на родител е повикан во полициската станица во Гостивар каде е разговарано со него и по целосното расчистување на настанот ќе се соочи со соодветен поднесок.