Удар на циклон создаде езеро
Објавено во: Свет 21 Март, 2019
Циклонот Идаи во Мозамбик создаде езеро.
Снимките од Европската вселенска агенција покажаа дека останало огромно езеро со димензии 125 со 25 километри, на местото кадешто претходно имало села и фарми. Претседателот Филипе Нјуси претходно изјави дека се верува дека може да има повеќе од 1.000 загинати.
Новите сателитски снимки од пристанишниот град Беира во Мозамбик ги открија вистинските размери на поплавите предизвикани од циклонот Идаи, кој го погоди јужниот дел на Африка пред неколку дена.
Голем број луѓе во и околу Беира кои побараа засолниште на покриви и дрвја сѐ уште чекаат некој да ги спаси.
„Нашата најголема битка е со времето. Досега се спасени повеќе од 3.000 луѓе“, изјави министерот за животна средина, Селсо Кореја.
Идаи удри во Беира со ветрови од 170 километри на час, пред да продолжи кон Зимбабве и Малави, при што беа погодени милиони луѓе. Досега има 380 загинати, од кои 217 се во Мозамбик.