Унгарија се ослободи од ММФ – ќе ги отплати преостанатите 2,2 милијарди евра

Добивај вести на Viber

Канцеларијата на Меѓународниот монетарен фонд во Унгарија наскоро ќе биде затворена. Агенцијата за управување со кредитниот долг во оваа земја во понеделник ќе го отплати преостанатиот дел од долгот кон ММФ и побара по отплатата да се затвори канцеларијата на оваа меѓународна финансиска институција во Будимпешта. По консултација со ММФ, Агенцијата ќе ги отплати преостанатите 2,2 милијарди евра од долгот во три валути, долари, фунти и евра. За исплатата на долгот нема да се собираат дополнителни девизни средства, бидејќи приходот од продажбата на февруарските унгарски евро-обврзници бил доволен за отплата на долгот. Унгарија својата намера за предвремена отплата на долгот и што побрзо да се ослободи од ММФ ја соопшти уште во јуни. Тогаш претседателот на Унгарската централна банка, Гиорги Матолчи, поранешен министер за економија во Владата на премиерот Виктор Орбан, побара од ММФ да си оди од земјата. Во писмото испратено до директорката на Меѓународниот фонд, Кристин Лагард, Матолчи му заблагодари на Фондот за помошта на Унгарија, кога земјата беше на работ на банкрот. Долгот регуларно требаше да биде отплатен до 2014 година. Унгарија за време на мандатот на социјалистичката влада во 2008 година зеде кредитна линија од ММФ во висина од 20 милијарди евра, а актуелната влада на премиерот Виктор Орбан во 2010 година одлучи да не го продолжува договорот за соработка, со што би ја одбегнала контролата од оваа финансиска институција. Унгарските власти ќе ја продолжат соработката со ММФ, а Будимпешта ќе остане членка на фондот и ќе се одржуваат редовните билатерални консултации, додека затворањето на канцеларијата е одраз на моменталниот став на Владата кон меѓународната финансиска институција. Економистот на банката ИНГ, Андраш Балатони, истакна дека затворањето на канцеларијата нема да има влијание врз пазарите, туку е порака за гласачите за унгарски избори, што ќе се одржат наредната година. Унгарија е првата европска земја која побара помош од ММФ, по падот на американската инвестициска банка Леман брадерс и на почетокот на глобалната финансиска криза. Во април ММФ ја затвори својата канцеларија во Латвија, откако земјата го отплати долгот за заем од 2008 година. ММФ во јули ја затвори својата канцеларија во Исланд. Во оваа земја канцеларијата на ММФ беше отворена во март 2009 година, откако земјата ја прифати поддршката од Фондот за обнова на економијата по финансискиот колапс во крајот на 2008 година.