УНИ Банка успешно ја држи пазарната позиција! Растат приходите од провизии и вложувања во обврзници

Добивај вести на Viber

Намалените нето приходи од камати се компензирани со зголемените приходи од провизии и со продажба на запленет имот. Во фокус на менаџментот беа одржување на пазарната позиција во кредитирање во комбинација со голем раст на вложувања во државни обврзници кои носат сигурни и безризични приноси

УНИ Банка успеа да ја одржи својата пазарна позиција во првата половина годинава, што е солиден резултат во најконкурентната група на средни банки како и во неизвесните услови на глобално стопанисување во пост ковид периодот. Според официјалните податоци од билансот на успех менаџментот на банката во овој период се концентрирал на одржување на нивото на кредитирање и на депозитната база, а намалувањето на нето приходите од камати во целост го покрил со растот на нето приходите од провизии и надоместоци како и со продажба на запленет имот (т.е. останатие приходи од дејноста).

Очекувано, со падот на каматните стапки и интензитетот на кредитирање, банката остварила помали нето приходи од камати во споредба со првото полугодие лани. Тие за периодот јануари – јуни изнесуваат 6,5 милиони евра и се за 489.000 евра пониски во споредба со истиот период лани. Во овој период банката остварила одличен раст на нето приходите од провизии и надоместоци. Тие се поголеми за 461.000 евра односно 37 отсто повеќе од истиот период лани кога изнесувале 1,71 милиони евра.

Останатите приходи од дејноста бележат најсилен релативен раст. Банката во првите шест месеци годинава од продажба на имот земен во обезбедување кредити наплатила 718.000 евра што е за 4 пати повеќе во однос на истиот период лани.

На расходната страна најголема ставка, како и кај сите банки, се резервациите за ризични пласмани. Тие се за 806.000 евра поголеми од истиот период во 2020 година и сега изнесуваат 2,4 милиони евра.

Токму заради растот на резервациите нето добивката на УНИ Банка е 1,75 милиони евра што е за 18 отсто помалку од истиот период лани.

Значајно за истакнување, од расположливите податоци во билансот на состојба, е тоа што банката била фокусирана на одржување на кредитното ниво со изразен раст на вложувањата во државни обврзници. Така за шест месеци нивото на кредити останало речиси идентично како на крај на 2020 година и на крај на јуни изнесува 270,4 милиони евра. За сметка на тоа менаџментот слободните средства ги вложувал во државни обврзници. На 30 јуни вредноста на тие вложувања е зголемена за 3,2 пати и изнесува 7,16 милиони евра. Депозитите на крај на јуни се на ниво од 314,1 милиони евра што е речиси идентично како и на крај на 2020 година.