УШТЕ НЕКОЛКУ ЧАСА ДО ИЗГЛАСУВАЊЕ НА НОВАТА ВЛАДА: Опозицијата бара предвремени избори, власта тврди дека легитимитетот е добиен на изборите пред две години
Објавено во: Македонија 16 Јануари, 2022
Вечерва до полноќ
ќе се изгласа за новата Влада чиј мандатар е лидерот на СДСМ, Димитар Ковачевски.
Собраниската расправа за избор на нова влада трае најмногу два дена, а за
изборот на владиниот состав се гласа по нејзиното завршување, односно најдоцна
до денеска до полноќ, за неа треба да гласат мнозинството од вкупниот број
пратеници во Собранието.
Во текот на денот, пратениците од власта и од опозицијата изнесоа спротивставени ставови. Опозицијата тврди дека оваа влада нема легитимитет и дека се неопходни брзи предвремени избори. Пратениците на владејачките партии пак велат дека со новата влада ќе биде обезбеден континуитет во политиките, а дека легитимитетот добиен на изборите пред две години е потврден со влезот на Алтернатива во мнозинството.
Тоа што особено предизвика интерес во јавноста е изјавата на пратеникот на ДУИ, Изет Меџити кој за повеќе медиуми рече дека нема да гласа за изборот на новата влада и дека не ја поддржува оваа Влада. Меџити и не е присутен на собраниската седница и нема да го даде неговиот глас за избор на новата Влада на Димитар Ковачевски, бидејќи не се согласува со кадровските решенија односно со фактот дека Бујар Османи и Артан Груби и натаму се во министерскиот состав.