В петок протест против судии
Објавено во: Македонија 14 Ноември, 2019
Пецо Грујовски, претседателот на УПОЗ, најави дека в петок дефинитивно ќе има протест против судиите во Македонија. Како причини, првиот човек на синдикатот ја наведува праксата судиите да си ги зголемуваат платите, а при тоа од тоа да нема ништо за судската администрација.
- Како резултат на општото незадоволство од работата на Судскиот буџетски совет и кога со тие средства судиите, за кои не важат закони, си доделуваат додатоци на плати, неоправдано, а за судските службеници секогаш изнаоѓаат изговор дека нема законска основ, го искажавме денеска незадоволството и во петок во сите судови во Македонија ќе има протест со цел последно предупредување до судиите да бидат поодговорни кон судската администрација, затоа што ова повеќе вака не може, рече Грујовски.
Тој смета дека судската власт, која е независна од извршната и законодавната, треба да го промени пристапот и од тие причини е побарано синдикатот да има претставник во Судскиот буџетски совет, бидејќи како што вели тој, неговата работа е нетранспарентна. Се бара и нова дефиниција на позицијата на судската служба и претставник во Судскиот совет најмногу поради одлучувањето при дисциплинските постапки.
Грујовски рече дека засега не се размислува за штрајк бидејќи во 2016 на тој начин незадоволните биле казнети со безмалку цела плата. Протестот ќе биде пред објектите од 9.30 до 11 часот со читање на барањата.