Вакво невереме немаме видено со децении – град со големина на тениски топчиња паѓал во Хрватска
Објавено во: Балкан 26 Мај, 2022
Големо невреме вчера попладне зафати дел од Хрватска, а најлошо беше во општините Голем и Мал Буковец, каде беа уништени оранжерии, а особено погоедени биле оранжериите во кои се одгледува цвеќе, и кои произведуваат половина од вкупното производство на цвеќе во Хрватска.
Невремето проследено со ветер, дожд и град со големина на „тениски топчиња“ во средата зафати дури пет жупани во Хрватска. До тамошната Дирекцијата за цивилна заштита пристигнале пријави за оштетени покриви, паднати дрвја на патишта и оштетени возила.
Погодените региони ги посетила и министерката за земјоделство, Марија Вучковиќ, и истакнала дека комисиите за проценка на штети ќе ги евидентираат штетите, додавајќи дека во цвеќарството тие се дури до 50 отсто. Посочила дека иако дел од производството било осигурано, проблематично е што има големи штети.
- Оранжериите се уништени, а има големи штети на посевите. За среќа, тогаш немаше никој во пластеници. Да беше некој во нив, денеска ќе зборувавме за повредени, можеби и за мртви. Во разговор со жителите, а има и такви кои се прилично стари, сите наведуваат дека вакво нешто не доживеале – посочува Анѓелко Стричак за „Н1“, жупан на Велики Буковец.
Според него, штом општинската комисија ќе ја утврди првата констатација на штета, ќе прогласи елементарна непогода за областа.
- Доколку се утврдат штетите во соседните општини, и таму ќе прогласиме елементарна непогода. Очекуваме разговор и да видиме кои се првите чекори кон надоместување на штетата. Веќе синоќа граѓаните самоиницијативно се организираа, си помагаа, позајмуваа плочки, покриваа згради... Се надевам дека во наредните денови ќе успееме да санираме барем станбени згради. Тешко ми е да проценам колку од нив се оштетени - вели тој.