Варшава отвора привремена болница на националниот стадион
Објавено во: Свет 19 Октомври, 2020
Полска планира да отвори привремена болница на националниот стадион во Варшава среде врвот на епидемијата на вирусот корона и преоптоварениот здравствен систем, соопшти Владата.
Полска воспостави нови дневни рекорди во бројот на заразени во последните неколку недели, а лекарите пријавија недостиг на персонал, болнички кревети и опрема.
„Во саботата, премиерот нареди подготовки за првата привремена болница, која ќе се наоѓа на националниот стадион“, рече Михал Дворчик, одговорен за проектот.
Болницата лоцирана во салите на стадионот ќе има кревети за 500 пациенти со КОВИД 19, со можност за проширување на 1.000 кревети. Првите кревети најверојатно ќе бидат достапни оваа недела.
Дворчик рече дека и други области ќе работат на воспоставување привремени болници.
Тој додаде дека владата нема намера да ги затвора гробиштата и да ги спречи луѓето да патуваат низ целата земја на 1 ноември, Денот на сите светци кога милиони Полјаци ги посетуваат семејните гробници.
Претходно оваа недела, владата ги повика граѓаните да останат дома и нареди затворање на спортски сали и базени, ограничувајќи го работното време во рестораните и префрлајќи се на учење на далечина за сите универзитети и средни училишта.
Владата вели дека се обидува да избегне целосен карантин, но експертите велат дека тоа би можело да биде неизбежно доколку ситуацијата стане критична.