ВЕЖБА „Одлучен удар“: На Криволак денес ден за високи гости
Објавено во: Македонија 17 Јуни, 2019
На армискиот полигон „Криволак“ денеска ќе се реализира Денот за високи гости на вежбата „Одлучен удар“ .
Ова го соопштија од Министерството за одбрана од каде ќе се презентираат офанзивни операции на пешадиската баталјонска група на Армијата на Република Северна Македонија, заедно со припадници на Националната гарда на Пенсилванија.
Дел од вежбата на Денот за високи гости ќе бидат воздухоплови на Армијата и воздухопловот Б-52 од вооружените сили на САД, специјални сили од Армијата на Република Северна Македонија, вооружените сили на Албанија, Бугарија и САД, како и артилериска поддршка од вооружените сили на Литванија.
На денот за високи гости ќе присуствуваат: претседателот на Република Северна Македонија и врховен командант на армијата, Стево Пендаровски, претседателот на Владата, Зоран Заев, заменичката на претседателот на Владата и министерка за одбрана, Радмила Шекеринска, министри во Владата, в.д. амбасадорката на САД, Микаела Швајцер-Блум,високи воени и цивилни претставници на вооружените сили и министерствата за одбрана на САД, Бугарија, Албанија, Грција и НАТО, како и амбасадори и одбранбени аташеи акредитирани во земјава.