(ВИДЕО) ДЕНОТ СТАНА НОЌ: Шумите се претворија во пепел
Објавено во: Свет 21 Август, 2019
Дождовните шуми во Бразил се претворија во пепел.
Фотографии од големи облаци на смог и чад ги преплавија социјалните мрежи во Бразил. Чадот достигнал дури и до Сао Паоло, што се наоѓа на речиси 3.000 километри од Амазон.
Оваа година се забележани 72.843 пожари, од кои повеќе од половина се наоѓаат во Амазон. Тоа е зголемување за 80 отсто во споредба со истиот период минатата година, информираа од ИНПЕ.
Пожарите ја „голтаат“ шумата со најбрзо темпо уште откога Националниот институт за вселенско истражување на Бразил (ИНПЕ) започна да ги следи во 2013 година.
Дождовните шуми Амазон често се нарекуваат и „белите дробови на планетата Земја“, поради тоа што тие произведуваат дури 20 отсто од кислородот во земјената атмосфера.
Шумите се сметаат за клучни во запирањето и намалувањето на глобалното затоплување, а дом се и на многу различни видови на флора и фауна. Амазон е најголемата дождовна шума на планетата и се простира на територија колку половина од Соединетите Американски Држави.
Пожарите во овој дел од светот најчесто се случуваат за време на сушните месеци, но и намерно се подметнуваат заради бесправно сечења на стеблата после пожарот.