(ВИДЕО) ЕУ РЕАГИРА: Израел урива палестински домови во Ерусалим
Објавено во: Свет 22 Јули, 2019
Властите во Израел итно да го стопираат уривањето на палестинските домови кое започна изутринава во источен Ерусалим, повикаа од Европската Унија.
Тие потсетуваат дека политиката на населување на Израел е нелегална според меѓународното право, и во согласност со долгогодишната позиција на ЕУ очекуваат израелските власти веднаш да ги стопираат уривањата кои се во тек.
Израелските власти утрово со булдожери урнаа десет палестински згради во кои се наоѓаат околу седумдесет станови во источен Ерусалим, односно во Зоните А и Б од Западниот Брег кои се под контрола на палестинските власти.
„Продолжувањето на оваа политика ја поткопува одржливоста на решението со две држави и перспективата за траен мир и сериозно ја става во опасност можноста Ерусалим да биде идна престолнина на две држави“, стои во реакцијата на ЕУ.
Акцијата се спроведува откако израелскиот Врховен суд минатиот месец пресуди дека тие згради ја кршат забраната за градба во регионот. Рокот на жителите да ги напуштат домовите истече во петокот.
Денешните уривања се дел од долгиот спор околу иднината на Ерусалим, кој е дом за повеќе од 500.000 Израелци и 300.000 Палестинци, но и свет град на јудаизмот, исламот и христијанството.