Виенска шницла и француски кроасани за 100 денари во Градски парк
Објавено во: Мои пари 18 Јуни, 2018
Советот на странски инвеститори и
Стопанската комора на Македонија го најавуваат третото издание на јавниот хепенинг, т.н. Светски пикник, кој ќе
биде отворен за сите посетители.
-По големиот успех од минатогодишните изданија на Светскиот пикник, продолжуваме да ја одржуваме идејата за промовирање на позитивните ефекти на странските инвеститори врз националната економија по пат на неформално дружење и претставување на културата на земјите од каде потекнуваат преку најавтентичните рецепти од нивните национални кујни, како и другите културни обележја – истакна Штефан Петер, претседател на Советот на странски инвеститори.
Се очекува на овогодишното издание на Светскиот пикник граѓаните да вкусат карактеристични рецепти од над десетина различни земји од каде што потекнуваат странските инвеститори – членови на Советот и тоа од: Австрија, Белгија, Велика Британија, Германија, Грција, Италија, Луксембург, Франција, Холандија, Хрватска, САД, Словенија, Турција и Швајцарија, а собраните средства ќе бидат донирани во хуманитарни цели.
Настанот се одржува третпат, а целта е презентирање на културата на земјите чии компании се членки на Советот на странски инвеститори. Посетителите ќе имаат можност за 100 денари да дегустираат некој од националните специјалитети: виенска шницла, француски кроасани, турски донер, грчко гиро,… Освен што ќе биде забавен, настанот, рече Петер, има и хуманитарен карактер. Сите средства ќе бидат донирани во народни кујни.
Претседателот на Советот апелира граѓаните да го посетат „пикникот“ независно од временските услови.
На првиот „Светски пикник“ во 2016 година имало преку 2.000 посетители.
Македонската јавност - граѓаните и претставниците на бизнис заедницата кои ќе присуствуваат на Светскиот пикник покрај можноста да се запознаат со различните вкусови на интернационалните кујни ќе уживаат во музиката на годинешните претставници на Евровизија – музичкиот бенд Eye Cue, а настанот ќе биде збогатен и со содржини за целото семејство, со многу музика, забава и анимација за деца.
Настанот ќе се одржи на 24 јуни 2018 година (недела) во Градскиот парк во Скопје, зад споменикот Гоце Делчев, со почеток во 12 часот.