Виктор Мизо кажа како до повисоки плати во зоните

Добивај вести на Viber

Платите се директно поврзани со продуктивноста, да се види состојбата на пазарот на труд и ние не треба да се гледаме како изолирана држава, туку да ги гледаме и конкурентите, изјави Виктор Мизо, претседател на Асоцијацијата на странски компании со технолошко напредно производство вечерва во Топ тема на Телма во однос на платите кои странските компании ги даваат на нашите работници. 

Вели дека ние 15 до 20 години сме тапкале во место и сме имале деиндустријализација. 

„Ние треба да вложиме во обука на персонал. Но, истовремено треба да земете во обзир кој е менталитетот на нашиот народ. Мобилноста кај нас е скоро непостоечка. Зборувам за миграција од град во друг град поради работа“, вели Мизо. 

Тој го поставува прашањето дали ние имаме квалификуван кадар за одредени позиции. Вели дека дел од кадрите треба да се обучуваат 6 месеци за да бидат подготвени за работа. Мизо рече дека мора да бидеме конкурентни за да имаме повисоки плати. 

Јован Деспотовски, директор на ТИРЗ вечерва на Топ тема на Телма изјави дека за година дена ќе зборуваме дека домашните компании го зголемиле својот потенцијал и извезуваат повеќе. Вели дека позитивен исход од мерките секако ќе има. 

„Ајде да направиме 10,15, 20 проекти и потоа да ги видиме ефектите“, рече Деспотовски. 

Бројките покажаа дека во зоните работниците земаат плати пониски од државниот просек. Деспотовски вели дека луѓето не би отишле да работат во Охрид за повисока плата, а мобилноста за споредба во Европа е широко распространета.