ВИКТОР МИЗО: Поради падот на автомобилската индустрија во Европа, и во странските компании што работат тука ќе забават плановите за вработување
Објавено во: Економија 10 Април, 2021
Автомобилската индустрија бележи лош старт откако почна годинава. Бројките за првото тримесечје покажуваат пад до 15 отсто од планираното, или до 25 отсто во спредба со лани. Намалената побарувачка на нови автомобили, големите залихи од минатaта година, недостатокот на микропроцесори и пожарот во фабрика за нивно производство во Јапонија се причините реалноста да биде посурова од очекувањата, вели претседателот на Асоцијацијата на странски компании со напредни технологии во развојните зони, Виктор Мизо, во изјава за ТВ Сител.
„Бројките не одат во насока кои беа очекувани. Според последните бројки од оваа недела, веќе, на глобално ниво, 2,4 милиони возила оваа година помалку ќе бидат произведени, заради овој недостаток, со тоа што најголемото влијание ќе биде на европскиот пазар. Сите овие услови ќе придонесат оваа година да се произведат за 1/3 или 800.000 помалку возила во Европа отколку што се планираше. Во вториот квартал се очекуваат уште полоши бројки, а падот е од 5 до 15 отсто“, изјави Виктор Мизо.
Од случувањата на европскиот пазар, ќе зависи колку брзо ќе биде опоравувањето кај нас. Засега, отпушатања на вработени нема, но нема ни нови вработувања.
„Дури некаде во третиот квартал се надевам дека ќе стигнеме до оние првобитно буџетирани бројки, но се ќе зависи од случувањата во Западна Европа, пред се од вакцинирањето и како тоа ќе ја афектира економијата. Но тоа не значи дека овде ќе имаме намалување на бројот на вработените, но ќе има забавување на брзаината на растот. Така што, сите оние планови што биле за да се вработат луѓе, тоа е одложено некаде за средината или втората половина на годината“, нагласува Мизо.
Инаку, во 20те компании кои произведуваат делови за автомобилската индустрија работат над 30,000 лица. Токму овие фирми го билдаат индустриското производство и обезбедуваат половина од вкупниот извоз.