Вишокот споменици во посебен парк, наместо да се „топат“

Добивај вести на Viber

Решавањето на проблематичните споменици за кои има спорна документација и ако се докаже и нелегална процедура ќе биде многу тешко, како за актуелната власт која внесе силна еуфорија кај своите активисти пред изборите со редовните напади на проектот Скопје 2014, така и за јавноста да прифати чекор кој би бил радикален или негативен за тоа што досега е направено без оглед на естетитката, вкусот или историската вредност.

Наместо топење на спомениците од бронза или пак нивно претопување во модерни скулптури, Горјан Тозија директорот на Агенцијата за филм, на новинарско прашање за негов став за спомениците спомена дека може да се направи посебен парк каде би се дислоцирале спорните споменици и скулптури од проектот Скопје 2014.

Ваквата идеја можеби звучи најбезболно доколку дојде до таков чекор на дислоцирање, но тоа ќе значи обезбедување на нов јавен простор или локација која нема да биде премногу блиску за очите на јавноста со што ќе добиеме еден вид на „отпад“ за споменици, па и ваквото решение ќе биде жестоко критикувано од ВМРО-ДПМНЕ и секако дежурните бранители на македонската историја.

Засега од специјалната работна група која беше формирана токму за наоѓање на недоследности кај спомениците до Министерството за култура се поднесени  првите елаборати за споменици од проектот „Скопје 2014“  - за Андон Јанев Ќосето кај комплексот судови и за Мајка Тереза и Воин на коњ на плоштад „Македонија“ за кои се прави анализа.