Владата еднострано ќе го раскине договорот за концесија на „Казандол“

Добивај вести на Viber

Владата наскоро најверојатно ќе го раскине договорот за концесија за експлоатација на минерални суровини со украинскиот инвеститор Сардич за локацијата „Казандол“. Како што беше најавено потребниот дополнителен рок за обезбедување на целосната документација е веќе завршен и подготвена е одлука која најпрво ќе треба да помине на усвојување на првата наредна владина седница.

Потоа ќе биде ставена на потпис и на премиерот Зоран Заев, по што се очекува да биде одземена дозволата за рудникот за бакар, злато и сребро во Казандол, валандовско. Главните причини за раскинување на договорот е тоа што инвеститорот не ги исполнил дел од своите обврски. 

„Еднострано се раскинува од страна на концедентот, бидејќи концесионерот не ја исполнил обврска од Договорот за концесија, односно во рок од две години од денот на доделувањето на концесијата за експлоатација на локалитетот „Казандол“, општина Валандово, општина Богданци и општина Дојран, не изградил постројка за експлоатација на катоден бакар со капацитет да процесира најмалку 50% од експлоатираната руда“,  е најверојатно содржината на дел одлуката за раскинување на договорот, информира ТВ 24.

Но Владата ќе треба да се брани пред арбитражниот суд во Лондон зашто најверојатно Сардич  ќе покрене постапка против Македонија и ќе бара отштета од 380 милиони евра за еднострано раскинување на договорот.

Целиот Југоисток организираше големи протести против изградба на рудник за кој се сомневаат дека ќе има штетни последици врз здравјето на луѓето и животната средина,. а се организираа и референдуми на локални ниво.

Јавното обвинителство, пак, паралелно со ова, истражува како била издадена концесијата за експлоатација на бакар во 2015 година.