Владата им исплати 2,6 милиони евра ковид-субвенции на Железници и Водостопанство

Добивај вести на Viber

Владата на 24 декември вонредно им исплати 2,6 милиони евра на акционерските друштва во државна сопственост Железници на РСМ Транспорт и Водостопанство.

На Водостопанство му се исплатени 100 милиони денари, додека истиот ден на Железници им се префрлени 60 милиони денари за справувањето со тешкотиите во кои се затекнати друштвата за време на пендемијата, односно за исплаќање на платите.

Ова е дополнителен финансиски буст за Железници Транспорт, но и товар за буџетот, ако се знае дека ова претпријатие редовно се субвенционира од Министерството за транспорт и врски, а има и своја наплата. Во ноември железничкиот сообраќај беше неколку дена во прекин. Машиновозачите протестираа поради неисплатен втор дел од октомвриската плата. Претходниот директор Аднан Азизи тогаш рече дека била побарана итна финансиска помош од Владата.

- Врз основа на Одлука на Владата за одобрување на средства од Буџетот за 2021 година, од П програма за мерки за справување со КОВИД-19 кризата, на МЖ Транспорт се исплатени 60 милиони денари, наменети за плати на вработените, се вели во одговорот на Владата за „Фактор“.

МЖ транспорт годинава веќе има доспеан а неплатен долг од околу 60 милиони евра. Односно, овој голем државен должник на крајот на првиот квартал од годинава должел 63,8 милиони евра.

АД „Водостопанство“, претпријатието за наводнување и одводнување, станува уште еден државен економски товар, затоа што не може на крај да излезе со исплатата на обврските и со наплатата на побарувањата.

Владата летоска објави дека подготвува пакет помош од 200 милиони денари за претпријатието за наводнување, а АД „Водостопанство“ поради проблемите со кои се соочува веќе побарало државна помош. Еднаш веќе доби 600.000 евра од Владата на крајот од минатата година за полесно справување со последиците од пандемијата. 

Владата на седница на 4 декември утврди и текстот на Предлог-одлуката за прераспределба на средства помеѓу буџетските корисници на централната власт и помеѓу фондовите. Со оваа одлука ќе им се дадат пари за справување со енергетската криза, финансиска поддршка на јавните претпријатија и акционерските друштва во државна сопственост погодени од кризата. Во субјектите кои ќе добијат помош се споменуваа и ЈП „Македонски шуми“, АД „Македонска пошта“ и АД „Еурокомпозит“.

А.К.