Владата ќе ги корегира мерките на Тевдовски за данокот на капиталните добивки
Објавено во: Економија 03 Октомври, 2019
Во Владата се размислува да се одложи одночувањето на капиталните добивки кое треба да стартува од следната година, најави вчера вицепремиерот Кочо Анѓушев. Оваа новина беше донесена со измени на Законот за личен доход уште лани кога беше воведен и прогресивниот персонален данок. Промените потекнаа од екс министерот за финансии Драган Тевдовски кој ги бранеше со тезата дека на таков начин се реалоцира богатството и се постигнува поголема еднаквост.
Инаку Законот предвидува граѓаните да плаќаат данок од 15 отсто за диведендите, да плаќаат данок за заштедите кои ги чуваат во банка, ако каматите годишно надминат 15 илјади денари, за каматите од хартиите од вредност, и данок на каматите од заемите.
„Сакаме да го стимулираме пазарот на капитал, сакаме да го стимулираме развојот на берзата. Доколку тоа е една од мерките коишто треба да се направат за да биде тоа стимулирано, секако ќе разговараме и за таа опција“, рече Кочо Анѓушев вицепремиер за економија.
Комисијата за хартии од вредност веќе поднела иницијатива до Владата и министеството за финансии за измени и дополнувања на Законот за личен доход, каде бараат одложена примена.