Владата ќе му дава 600 евра на германскиот експерт на Меркел за да го советува Ковачевски

Добивај вести на Viber

Јоханес Хајдекер, поранешен советник на долгогодишната германска канцеларка Ангела Меркел, ќе биде платен од Владата со 36.000 денари месечно откако се најде во скратената листа од 12 надворешни советници на македонскиот премиер Димитар Ковачевски.

Хајдекер е именуван за „надворешен советник - интегриран експерт за зајакнување на капацитетот на економскиот тим во канцеларијата на претседателот на Владата на Република Северна Македонија“.

Владата ги објави хонорарите на надворешните соработни, иако за повеќето од нив приходите и претходно протекоа како медиумска информација, освен услугата што ќе ја наплаќа германскиот експерт.

Неговиот хонорар е ист како и повеќето од новата помала група на надворешни соработници на премиерот.

Инаку, тој стана надворешен советник за зајакнување на капацитетот на економскиот тим на премиерскиот кабинет во 2021 година, кога премиер беше Зоран Заев, а сега ќе продолжи и со Ковачевски.

Покрај него, Владата ќе прима совети од уште еден Германец – Валтер Дефа, кој е номиниран од Канцеларијата на германскиот канцелар. За разлика од Хајдекер, Дефа привремено доаѓа во земјава и не е на платен список на македонската Влада.

Ковачевски го намалува бројот на надворешни советници само на дузина, додека неговиот претходник Заев имаше над 50.                                                           А.К.