Владимир Хари Крстевски: Секој да преземе одговорност за ѓубрето што се фрла на Водно
Објавено во: Македонија 20 Јануари, 2020
Водно е едно од главните прибежишта во Скопје кое е лесно достапно како за планинари, рекреативци и спортисти така и за голем број на граѓани кои сакаат да избегаат од загадувањето. Сепак, мора да се внимава на природата бидејќи се поголемиот број на посетители значи и зголемен ризик од несовесно поведение, од зголемена количина на фрлено ѓубре и загрозување на животната средина. Здружението Explore The Mountains оваа недела го посвети денот на планинарска акција за чистење на патеките од ѓубре искачувајќи се до крстот на самиот врв. Со Владимир Хари Крстевски поразговаравме за одговорноста која треба да ја преземат сите посетители бидејќи како што вели тој не треба некој да очекува дека после нив некој ќе чисти.
Како се одвиваше вчерашната акција за чистење на патеките на Водно и со што се соочивте на терен?
Владимир Хари Крстевски: Здружението Explore The Mountains одлучи овој ден (недела 19.01.2020) да го посвети на чистење на патеките на Водно. Акцијата започна со чистење на планинарската патека што води до средно Водно од полициската станица Водно. Потоа следуваше чистење околу паркингот, клупите и останатите реквизити на средно Водно. На крај поради замрзнтите патеки што водат кон врвот на Водно, волонтерите одлучија да ја исчистат трим патеката кој води до локалитетот Марково Крувче како и самиот локалитет, каде всушност се собра најголема количина на ѓубре направено од несовесните граѓани.
Како подобро да се грижиме за природата, особено за планини како Водно?
Владимир Хари Крстевски: Планината Водно се повеќе и повеќе се комерцијализира. Многу здруженија организираат забави, настани, журки, така што самата таа експонираност на планината доведува до се повеќе и повеќе загадувања од човечки фактори. Затоа е потребно сите организации да се фокусираат на што е можно повеќе вакви акции. На крајот од денот совеста, етиката и здравиот разум на човекот е едниствениот спас за чистотата на Водно. Се додека планинарските патеки ги третираме како улица, каде што мислиме дека можеме да фрламе отпадоци и некој ќе дојде да зачисти по нас, покажуваме дека немаме еколошка свест, особено на планините.
Дали оваа акција ќе продолжи во иднина и очекувате ли поголема вклученост и на останати заинтересирани?
Владимир Хари Крстевски: Вакви акции се прават многу често од нашето здружение, но овој пат одлучивме да биде јавна, се со цел за да видиме колкав ќе биде одзивот кај планинарите кои најмногу одат на Водно. За жал бевме само шест души, но тоа не не обесхрабрува, напротив не прави посилни за продолжиме да ги чуваме сите планини. Да се стопи снегот па планираме подетално да му се посветиме на Водно, а воедно и на другите планини.
Х.С.