Владо Бучковски: Ме охрабри изјавата на Петков за македонските црвени линии
Објавено во: Македонија 03 Јануари, 2022
Специјалниот претставник на македонската Влада, Владо Бучковски, како посебен момент од најавата за циклусот преговори помеѓу новите влади во Македонија и Бугарија ја издвои изјавата на бугарскиот премиер Кирил Петков дека не можат да се занемарат македонските црвени линии.
- Ќе се продолжи таму каде што се стигна, а тоа е отворен дијалог за пакетот понуден од бугарска страна пет плус еден. Тоа што мене ме храбри е интервјуто на премиерот Петков во кое што споменува дека треба и мора да се почитуваат и македонските црвени линии кои се преточени во резолуцијата која беше усвоена во нашиот парламент, вели поранешниот македонски премиер во денешното интервју за Радио Слободна Европа.
Петков пред две недели истакна дека има желба да се сретне со новиот македонски премиер во втората половина на јануари, при гостувањето во емисијата „120 минути“ на БТВ, додавајќи дека и македонската страна има црвени линии, кои, како што вели, не може да се занемарат.
Денеска и министерот за надворешни работи Бујар Османи на својата прес-конференција рече дека очекува конструктивен дијалог помеѓу новите влади на двете земји и нормализирање на односите.