Власта и опозицијата во Косово со поддршка за Харадинај
Објавено во: Балкан 20 Јули, 2019
Весели, кој е и претседател на владејачката Демократска партија на Косово, пишува на Фејсбук дека од медиумите дознал за повикот на Специјалниот суд како и за оставката на Рамуш Харадинај.
„Борбата на Ослободителната војска на Косово беше чиста и фер, и сигурен сум дека чесноста и борбата на нашиот народ за слобода и независност треба повторно да се потврди. Владината коалиција беше формирана со цел да се направи голема одлука за Косово и да се заштити вредноста на ОВК“,напиша Весели.
Тој, исто така додаде дека сите дејства и одлуки ќе бидат во најдобар интерес на Косово и во целосна согласност со косовските закони.
Косовскиот претседател Хашим Тачи претходно изјави дека ја почитува одлуката на Харадинај да поднесе оставка и потврди дека, пред Харадинај, Специјалниот суд повика неколку други водачи на ОВК.
Во исто време, претседателот на опозициската Демократска лига на Косово, Иса Мустафа, изрази жалење поради повикот на Рамуш Харадинај пред Специјалниот суд.
„ЛДК постојано повикува на оставка на оваа влада, но жалиме што ова се случи поради повикот на Специјализираните комори на премиерот Харадинај“, рече Мустафа.
Тој истакна дека цврсто верува дека војната на Ослободителната војска на Косово е чесна и чиста и дека верува дека невиноста на Рамуш Харадинај ќе биде уште еднаш докажана.
Харадинај во петокот објави дека поднесува оставка како премиер на Косово по добивањето на повик да се појави како осомничен пред Специјалниот суд во Хаг.