ВМРО-ДПМНЕ бара одговорноста за нерационално потрошените над 500 илјади евра европски пари
Објавено во: Македонија 16 Октомври, 2020
Одговорноста за нерационално потрошените над 500 илјади евра европски пари, бараат од ВМРО-ДПМНЕ.
ВМРО-ДПМНЕ денеска протестираше против незаконското трошење на пари на европските даночни обврзници кои што се наменети за образование и образовни проекти на македонските граѓани.
„Директорката Лидија Димова, кадар на СДСМ потрошила речиси 500.000 евра за тренинг на магаре, за испробување на сирење и за проекти со нејзиниот пријател кој што има фризерница. Мислиме дека е многу неморално во вакво време на пандемија и би било многу посоодветно овие 500.000 евра да биле потрошени за помош на болницата во Струмица, на болницата во Битола и на болницата во Тетово за обука на персонал и за поддршка на овие болници во борба против пандемијата или во најмала рака овие 500.000 евра да биле потрошени за купување на 2200 компјутери за деца кои што не можат да ја следат наставата во овие кризни услови. И затоа сметаме дека одговорноста не е само кај Лидија Димова, туку одговорноста е кај тие што ја поставиле, нејзиниот шеф Зоран Заев како и нејзината пријателка Радмила Шекеринска“, вели Антонио Милошоски од ВМРО-ДПМНЕ.
Или да поднесе оставка самата или вицепремиерот Љупчо Николовски ќе бара да биде разрешена Лидија Димова, директорката на Националната агенција за европски образовни програми и мобилност. Димова може да биде разрешена од Управниот одбор, а ваков исход може да биде извесен откако во јавноста се фрлија сомнежи за тоа како се делеле пари за образовни проекти преку агенцијата.
Димова тврдеше дека нема вина, а Николовски вели дека е обратно.