ВМРО-ДПМНЕ: Грција сака да купи дел од МЕПСО
Објавено во: Македонија 20 Октомври, 2023
ВМРО-ДПМНЕ денеска излезе со соопштение дека Грција сака да купи дел од системот за пренос на електрична енергија МЕПСО.
Според најголемата опозициска партија, во Грција има информации дека грчкиот електропреносен систем, во кој што удел има и Кина, е заинтересиран за ваков договор со македонската власт.
„Тоа значи дека грчкиот електропреносен систем, сака да купи дел од македонскиот електропреносен систем и на тој начин, Македонија целосно ќе ја изгуби својата енергетска независност како држава, односно ќе зависи во тој дел од друга странска држава.
Додека на власта и е полна устата со ЕУ, НАТО и Америка, во исто време 24% и златна акција во ИПТО има најголемата кинеска државна компанија. Значи 76% е на Грција, а 24% е на Кина“, реагираат од ВМРО-ДПМНЕ.
Од таму додаваат дека на СДССМ и ДУИ им е важен само личниот профит, преку зделки, со тие што ќе понудат највеќе.
„Народот е свесен дека оваа криминална власт на ДУИ и СДС, ги продава националните интереси на Македонија, само да приграби што повеќе милиони за себе и своите роднини. Затоа народот на следните избори ќе ги порази, а потоа ќе дојде и одговорноста“, коментираат од партијата.