ВМРО-ДПМНЕ ја уцени власта: Наш јавен обвинител за Вељаноски, инаку нема да ги поддржиме реформите
Објавено во: Македонија 21 Февруари, 2019
Никола Мицевски, координаторот на пратеничката група на ВМРО-ДПМНЕ, денеска заедно со останатите пратеници на прес-конференција истакна дека нема да ги подржи реформите на власта доколку не се одреди нов главен јавен обвинител на нивни предлог кој ќе го процесира случајот и на Трајко Вељаноски, поранешниот претседател на Собранието.
Денеска пристигна барањето од основниот суд до Собранието да му се симне пратеничкиот имунитет на Вељаноски и ако тоа мнозинството го изгласа тогашп на поранешниот спикер му следува притвор за организирање на настанот од 27 април.
- Претходно имаше осум случаи со симнување на пратенички имунитет и сега уште еден за пратеник од редовите на опозицијата, која нема да го толерира ваквото однесување. Пратеничката група нема да ги поддржи системските промени и закони додека власта не се согласи на јавен обвинител на предлог на опозицијата. Ова беше и барање на актуелната власт да се избира јавен обвинител по предлог на опозицијата - рече Мицевски.
Тој напомена дека со овој потег меѓународните партнери не треба да се налутат и треба да разберат дека ова се прави поради односот од страна на власта кон опозицијата. Додаде дека во овој момент четвртина од пратениците на ВМРО-ДПМНЕ се под обвиненија.
Наведе дека притворот на екс-министрите Миле Јанакиески и Спиро Ристовски, како и на Вељаноски, се закани за целокупниот изборен процес за нов претседател на Македонија.