ВМРО-ДПМНЕ: Намалена казната на Мијалков за да не падне владата
Објавено во: Македонија 08 Март, 2021
ВМРО-ДПМНЕ излезе со реакција по информацијата дека на екс шефот на тајната полиција, Сашо Мијалков, ќе има реална казна затвор од 9 години наместо 12 поради тоа што едно од делата за кои е осуден во случајот таргет-Тврдина му застарува на 28 март.
Од таму претпоставуваат дека власта ова го договорила со Мијалков додека тој кратко беше во бегство со цел да не падне Владата и да не го загуби мнозинството во Собранието.
„Како поминуваат деновите, така се топи казната на Мијалков во години. Дали казната на Мијалков од 12 ќе се стопи на 9 години, и дали тоа ќе го потврди апелација? Дали ова е дел од договорот Заев - Мијалков?
Му простува ли Заев на Мијалков за да Мијалков преку свои пајташи прикажува вештачки кризи во ВМРО-ДПМНЕ?
Поминаа две недели од бегството на Сашо Мијалков, а власта се уште крие детали од случајот. Заев молчи и не кажува дали два дена колку што Мијалков бил во бегство се договара со него и дали во ЈО е донесен со владин црн пасат.
Откако Мијалков се јавил во ЈО до драмата пред камери има 40 минути. Зошто Мијалков е пуштен 40 минути да се шета на околу наместо веднаш да се однесе во куќен притвор? Дали циркусот на Мијалков пред ЈО беше дел од договорот Заев - Мијалков, со цел да не падне владата на првиот?
Мафијашката коалиција Заев - Мијалков функционира и од затвор. Македонија нема мир додека и Заев не се најде зад решетки“, се вели во реакцијата.