ВМРО-ДПМНЕ: Што му отстапи Заев на Ахмети на тајна средба?
Објавено во: Македонија 12 Јуни, 2019
Македонскиот премиер Зоран Заев се пазарел со отстапки со лидерот на ДУИ, Али Ахмети, на тајна средба за време пред вториот круг од претседателските избори, вели ВМРО-ДПМНЕ во своето последно соопштение за јавност.
„Дали Република Македонија и натаму ќе се редефинира, дали ќе се исцртуваат нови граници? Зоран Заев е должен да им каже на граѓаните дали пред вториот круг од претседателските избори тој се сретнал со Али Ахмети и за што се разговарало на оваа тајна средба. Тој мора да запре со политиката на пазарење на сметка на државните и националните интереси со единствена цел зачувување на својата фотелја на Илинденска б.б.“, велат од партијата.
Од таму бараат промени и на предлог-законот за попис, односно првенството да не се става, како што велат од опозицијата, на матичните броеви.
„Функциите се минливи, а Република Македонија е се што имаме, Зоран Заев мора да го разбере ова. Премиерската фотелја не е поважна од интересите на македонските граѓани. Од интерес на граѓаните е да се спроведе Европски попис, а не попис каков што Заев договорил на тркалезна маса, попис на матични броеви. Пописот е статистичка, а не политичка операција, операција од суштинско значење за тековите во една држава“, се додава во соопштението на ВМРО-ДПМНЕ.