ВМРО-ДПМНЕ тврди дека со Договорот се брише македонската нација - што одговорија од СДСМ?

Добивај вести на Viber

Oд ВМРО-ДПМНЕ велат дека идните граѓани на Македонија, учениците, ќе учат историја напишана од грчки научници и тоа по вина на Зоран Заев и СДСМ. 

Сметаат дека со Договорот за името се забранува употребата на македонското сонце, македонските топоними треба да се заменат со грчки, а треба да се направи и ревизија на учебниците.

„Зоран Заев и Никола Димитров со овој договор сакаат со пенкало да ја избришат целата македонска нација, целата нејзина историја, се атакува на нејзиното културно наследство, целосно на нејзината државност, прикажувајќи ја целосно како нова, вештачки измислена творба. Иако тоа не беше дел од преговорите, сега со добрата волја на Заев, од македонската меморија ќе треба да се избришат Солун, Кукуш и Лерин“,-изјави Игор Јанушев – генерален секретар на ВМРО ДПМНЕ .

Од СДСМ тврдат дека постигнатиот Договор со Грција е патриоски чин којшто го гарантира и зајакнува македонскиот идентитет и ги отвора вратите за членство во НАТО и ЕУ. 

„Во однос на топонимите, членот 8 став 4 од Договорот обезбедува чисто и соодветно решение согласно меѓународните стандарди. Притоа им се дава приоритет на ендонимите, наместо егзонимите и тоа важи и за двете страни. Приоритет не значи забрана. Ист е случајот и со формирањето на Заедничкиот комитет кој ќе работи во согласност со начелата и целите на УНЕСКО и Советот на Европа, а неговото делување исто така ќе важи за двете страни подеднакво“- наведуваат од СДСМ. 

Партиските преписки за Договорот траат со денови.