Во Германија претепан пратеник-популист
Објавено во: Свет 08 Јануари, 2019
Пратеник во германскиот Бундестаг, Франк Магниц, е претепан до бесознание во Бремен и од понеделникот се уште е згрижен в болница. Се работи за претседател на бременскиот оркуг на АФД (Алтернатива за Германија) која е позната по тоа што е националистичка, популистичка и евроскептична партија во Германија.
Десничарот бил брутално претепан на улица.откако бил пресретнат од тројца маскирани мажи со безбол палки во центарот во Бремен, кои го претепале и го оставиле онесвестен на улицата со сериозни повреди на главата.
Станува збор за 66-годишен политичар кој има давано ксенофобични изјави и го мрази еврото, како валута, која според него, важи за експеримент. Порано бил поддржувач на ЦДУ и канцеларката Ангела Меркел, но од 2013-та и се приклучува на десничарската партија. Има шест деца и управува со недвижнини, а во Бундестагот челнува во парламентарните групи за градежништво и за транспорт.
Во меѓувреме, освен германските медиуми, за настанот објавија и американскиот Фокс њус, британскиот Мирор и францускиот Ле Фигаро.
„Ќе останам тука уште подолго време“, објави Магниц од болница и напиша дека од сега ќе внимава каде и како се движи во јавност. Вели дека напаѓачите го удирале по главата додека не ја загубил свеста и дека не се сеќава дали му упатиле закана, ниту пак им ги видел лицата.
Во моментов во болница го чуваат двајца полицајци, а јавното обвинителство покрена истрага, при што ќе треба да се утврди дали покрај нанасување физички повреди има и обид за убиство.
Неговата партија досега била честа мета на вандализирање на канцеларии и автомобили, но немало ваков сериозен физички напад.