ВО ГРЦИЈА ЗА УШТЕ ЕДНА НЕДЕЛА ПРОДОЛЖЕНИ МЕРКИТЕ: Ноќните клубови, дискотеките, бузуки ќе примаат само вакцинирани
Објавено во: Балкан 22 Јули, 2021
„Предуслови за влез во земјата за да се ограничи ширењето на
Ковид-19“ е новата одлука на грчката
Влада според која до 29.
јули остануваат на сила актуелните
правила за влез во Грција, односно задолжителен документ за Ковид-19 и пополнет
PLF формулар, јави дописничката на МИА од Атина.
Согласно новата министерска одлука, ноќните клубови, дискотеките, бузуки и слично во Грција, без оглед дали се на отворено или затворено, ќе примаат исклучиво вакцинирани гости или оние кои прележале Ковид-19, Иако новите мерки кои стапуваат денеска во сила, првично се однесуваа само на затворени простори, сега, во објавената одлука од надлежните министерства има промени во однос на ноќните клубови.
За кафулињата и рестораните, мерката само за вакцинирани гости се однесува само на внатрешните делови, додека пак за ноќните клубови важи и за оние на отворено и на затворено.
Од Министерството за туризам на Грција, преку соопштение појаснуваат дека апликацијата „Covid Free GR” за скенирање на сертификатите и потврдите се однесува само на грчки граѓани и на државјани на земјите членки на ЕУ, односно на оние кои имаат европски сертификат.
За останатите, за државјаните на трети земји доволно ќе биде само при влезот да се покаже сертификатот за вакцинација во печатена или електронска верзија, заедно со документ за лична идентификација.