Во иднина ќе нема кој да им намести плочки, цевки и плакари на Македонците
Објавено во: Економија 15 Декември, 2018
Дарко Велков, кој го следи пазарот на трудот на електронската страница „Вработување“ , за РСЕ предупреди дека во иднина ќе има сериозен недостиг на работници во конкретни сектори кои им нудат услуги на семејствата во нивните домаќинства.
„Според мене за некои пет до седум години ќе има проблем во рударската индустрија, сите занаетчиски професии, буквално нема да може да се најде човек за местење плочки, водоинсталатер, столар итн”, вели Велков.
Тој вели дека не постои една причина за таквиот тренд, туку проблемот е многу покомплесен. Како причини ги наведува родителите кои не ја следат желбата за образование на детето туку го форсираат за тоа што тие сметаат дека е најдобро, незаинтересираноста на луѓето за личен развој, немањето добри работни навики и секако стратегијата.
„Не може сите да бидат запишани во гимназијата Јосип Броз Тито, туку секој треба да отиде таму каде што се неговите силни страни. А и родителите со ставовите за 200 евра немој да работиш им прават огромен проблем на сопствените деца затоа што со тоа го прескокнуваат делот на создавање на работни навики”, вели Велков.