Во летната жега „Прилепска пиварница“ направи приход од 10 милиони евра

Добивај вести на Viber

Во летната жега од почеток на јули до крај на септември Македонците дневно за пива и сокови на Прилепска пиварница плаќале 108.650 евра. За третиот квартал оваа компанија направила приход од 10 милиони евра

Прилепската пиварница во летните месеци (јули, август и септември) направи приход од 10 милиони евра од продадени пива и сокови, покажуваат официјалните податоци на најуспешната домашно поседувана пиварница за првите девет месеци годинава објавени на веб платформата СЕИ НЕТ на берзата.

„Златен Даб“ и „Крали Марко“ заедно со прочуената прилепска „Газоза“, интернационалниот бренд „Пепси“ и домашните „Миринда“ и „Портоколада“ покажаа дека се омилени пијалоци на Македонците. Вкупната продажба на Прилепска пиварница за третиот квартал изнесува 10 милиони евра за 92 дена. Односно просечно дневно 108.650 евра приход. Информација што сигурно ќе ги охрабри многубројните акционери на втората најголема пиварница со седиште во земјава.

Вкупниот приход за првите девет месеци е 23,9 милиони евра, а дури 10 милиони евра се направени за третиот квартал. Тоа е безмалку приход колку што имаат првите два квартали заедно. Значајно да се истакне е тоа што безмалку целиот приход од продажба е остварен на домашниот пазар. Приходите за првите девет месеци годинава се поголеми за 1 отсто во споредба со истиот период лани. Голем раст во овој период бележат оперативните расходи кои на крај на септември достигнаа 23,97 милиони евра и се за 8 отсто повисоки од истиот период лани. Во структурата на расходите најмногу растат трошоците за набавна вредност на трговски стоки кои се поголеми за 1,2 милиони евра од лани и изнесуваат 5,6 милиони евра. Услугите со карактер на материјални трошоци пораснале за половина милион евра во однос на лани и достигнаа 2,1 милиони евра. Оперативната добивка на друштвото заклучно со септември е 381.000 евра и е за 81 отсто пониска од истиот период лани.

Благодарејќи на одличниот скор меѓу финансиските приходи и расходи Прилепска пиварница е во позитива 272.000 евра. До одбивањето на данокот нето добивката е 653.000 евра и тоа во споредба со лани е помал резултат за 72 отсто.

Р.Ф.