Во Македонија се увезува неквалитетен мазут од Србија
Безбедносни и еколошки последици е резултатот од користењето гориво со несоодветен состав и низок квалитет.
Објавено во: Мои пари 17 Април, 2018
До државниот пазарен инспекторат е пристигната претставка дека се врши увоз на мазут од Србија којшто е неквалитетен и не ги исполнува пазарните стандарди наложени според важечкиот правилник за квалитет на течните горива.
Во спецификација направена од контролното тело, ова гориво отстапува односно ја надминува дозволена максимална вредност на кинетички вискозитет на 100 степени Целзиусови, чија максимална гранична вредност треба да биде 28 mm2/s. Оваа вредност во увезеното гориво е 32,81mm2/s, далеку повисока од пропишаната. Како што дознаваме овој мазут се користи во некои производствени капацитети во земјава.
Безбедносни и еколошки последици е резултатот од користењето гориво со несоодветен состав и низок квалитет. Штети врз опремата каде што се користи и штети врз целосниот производен процес. Дополнително, неговата употреба предизвикува и еколошки импликации, односно согорувањето може да предизвика и загадување на воздухот. Со оглед на строгите стандарди што течните горива мора да ги исполнуваат, еколошките импликации се највисоко на листата на стандарди што треба да се почитуваат.
Подеднаква штета, спорното гориво предизвикува и на пазарот односно другите увозници создавајќи нелојална конкуренција, нарушувајќи го пазарот и предизвикувајќи сериозно финансиски штети врз работата на другите субјекти.
Ова гориво со штетни последици и низок квалитет ги премина царинските служби и покрај спорниот состав.