ВО ПЕТОК НА РАБОТА ДО 13 ЧАСОТ: Што велат газдите, а што работниците?

Добивај вести на Viber

Секој петок да се биде на работа до 13 часот. Oва е предлог на ДУИ со кој се бара во петоците да се работи со скратено работно време. 

Целта е велат, граѓаните да имаат повеќе време за да се посветат на семејството, а на тој начин да се зголеми и нивната продуктивност на работните места. Овој предлог ќе биде дел од изборната програма на ДУИ на претстојните избори.

Маријана Перковска од Текстилниот кластер објаснува дека ова е неприфатливо, затоа што се прават споредби со странство, но на несоодветен начин. Додава дека во светот не постои индустрија каде се работи по 5-6 часа и тоа само во една смена. Перковска вели дека друг проблем е тоа што во земјава имаме голем број неработни денови.

Но, и во други секори има отпор.

„Мене тој предлог не ми се допаѓа, затоа што нема да одговара никому. Тоа не е добро ниту за газдите, ниту за работниците. Но, сепак платата зависи од прометот, а не од тоа до колку часот се работело. Ако имаме промет, ќе има и повисоки плати за работникот“, вели сопственик на фирма која се занимава со трговија во Свети Николе.

Кирил Каракутовски, сопственик на млекарницата „Малеш“ од беровско, кој има 17 вработени и 200 кооперантни, смета дека оваа мерка воопшто не е поволна за приватниот сектор, а би била прифатлива само доколку работниците во земјава се плаќаат по работен час.

„Доколку во Македонија работникот се плаќа по работен час, тогаш може да напушти два часа порано, и нема да има проблем“, додава Каракутовски.

Дел од работниците слушнале за овој предлог на ДУИ.

„За мене не е в ред да се работи во петок до 13 часот, затоа што се знае, имаме сабота и недела за одмор. Ако се работи само до 13 часот, ќе биде исто како да не е работен ден. Во државава немаме некој ред, многу се испомешани работите“, смета младиот Јетон А. од Тетово кој работи во приватен сектор.

Во светот постојат фирми во кои веќе извесен период се работи со скратено работно време, а Финска е првата земја со предлог да се работи само 4 дена во неделата и тоа со скратено работно време. Оваа идеја ја разгледува и Данска.