Во руски воздушни бази далеку од фронтот имаше експлозии, не е познато дали Украина поседува ваква муниција
Објавено во: Свет 05 Декември, 2022
Три лица загинаа, а 2 воени авиони се оштетени во украински напад со дронови.
Мистериозни експлозии се случија денеска во две руски воздушни бази далеку од првите линии на фронтот. Можно е Киев да нашол начин да ги гаѓа руските бомбардери со долг дострел што се користат во нападите врз инфраструктурата на Украина.
„Украински напад со беспилотно летало врз две руски воздушни бази во регионите Рјазан и Саратов резултираше со смрт на тројца војници и мала штета на два авиони“, објави денеска руското Министерство за одбрана.
Четворица војници се пренесени на лекување во воените болници. Кремљ соопшти дека Владимир Путин бил информиран за инцидентите.
Според извештаите од украинска мониторинг-агенција, Русија испорачувала крстосувачки ракети до воздухопловната база Енгелс и префрлала авиони во воздухопловната база Рјазан како подготовка за нов напад против Украина. За Украина не е познато дека располага со муниција што би ѝ овозможила да нападне стотици километри подалеку од линијата на фронтот на конфликтот. Сепак, има извештаи за такви беспилотни летала во развој.