Водоинсталатерите ќе имаат највисоки плати, а фалат бравари, тесари, заварувачи
Објавено во: Финансии 23 Декември, 2019
Водоинсталатерите во соседна Србија ќе имаат највисоки плати, а фалат бравари, тесари, заварувачи, столари и други занаетчии.
Српскиот претседател Александар Вучиќ вели дека имаат проблем да обезбедат работници, а на градилиштето „Белград на вода“, работат Романци, Срби од БиХ, Албанци од Македонија и други.
Невработеноста е 9.5 отсто, но Вучиќ вели дека реално бројката е помала затоа што луѓето сакаат да извлечат некои права додека се под Бирото за вработување.
„Кај нас водоинсталатерите ќе бидат најплатени,. и треба да бидат затоа што навреме не сме пресметале дека тие ќе ни требаат повеќе од правниците. Мора да сфатиме кои занаетчии ги нема на пазарот на труд“, рече српскиот претседател.
Тој додаде дека инсистира на „мини Шенген“, не за да се слика со премиерите Еди Рама и Зоран Заев, туку за да обезбеди работна сила каква недостига.
Вучиќ вели дека не е целта да се зголемат платите за одредени професии, туку треба однапред да се предвиди што ќе биде потребно на пазарот на труд.
„Ние денес не можеме да изградиме ниту еден автопат без работници од страна“, вели Вучиќ.
Објаснува дека затоа ќе растат платите на занаетчиите, а ќе се намалуваат на менаџерите, и на сите други.