Вучиќ: Геополитичките околности за нас се полоши отколку што беа во изминатите десет или 15 години
Објавено во: Балкан 03 Февруари, 2023
Ова не е прашање на љубов или идеологија, ова е прашање на опстанокот на нашиот народ и опстанокот на нашата земја, изјави српскиот претседател Александар Вучиќ за решението за Косово кое Западот го нуди.
Тој вели дека заканите од Западот не треба да се потценат. За тоа дали има шанса за нова платформа за Косово, српскиот претседател рече дека геополитичките околности за нив се полоши отколку што беа во изминатите десет или 15 години.
Вучиќ, денеска изјави дека Србија не е во атлантските интеграции и не сака да влезе во НАТО, но љубоморно ја чува својата воена неутралност, пренесува „Танјуг“.
„Никогаш нема да преговарам за да останам на власт, ме интересира опстанокот и напредокот на Србија“, рече Вучиќ.
Втор ден во српското Собрание има расправа за Косово. Вчера настана мешаница и за малку ќе се случеше тепачка. Западот нуди француско - германски предлог за решавање на косовското прашање.