За пасоши ќе има обрасци некаде до средината на февруари
Објавено во: Македонија 28 Јануари, 2020
Новиот министер за внатрешни работи, Наќе Чулев вели дека поради лоши планови и анализи во МВР фалат обрасци за лични документи. Тоа се случува со пасошите, а недостасуваат и возачки дозволи кои ќе стигнат на крајот на месецот. Додаде дека проблемот е решен само со личните карти.
Објасни дека за патни исправи има обрасци за некаде до средина на февруари, во согласност со планот и лошата анализа која е направена во МВР, а патните исправи треба да стигнат на крајот на март.
„Сега ќе правиме дополнителни напори за да се надмине тој проблем. Во тие анализи не е предвидено дека ќе има зголемено побарување поради неколку причини. Како прво имаме избори кои се знаеја уште порано. Втора работа е за оние што се извадени во 2009-та и по десет години истекуваат и треба да се сменат. И третата причина е што владата впведе земање на лекови со документи поради што исто така има зголемена потреба од нови лични документи“, кажа Чулев.
Чулев вели дека е дадена наредба и во внатрешната контрола во тек е проверка дали и последниот тендер за набавка на обрасци за лични документи е направен законски.
Лани е склучен договор за набавка на обрасци за документи за наредните две години во вредност од речиси 20 милиони евра.