За Пендаровски македонскиот јазик е факт, додека Ангелов кажа кој е официјалниот став на Софија

Добивај вести на Viber

Македонскиот претседател Стево Пендаровски вели дека македонскиот јазик е факт и би било губење време да се убедуваме дали тој постои или не постои. 

Ова е неговиот одговор на тврдењето на Бугарската академија на науките дека македонскит јазик не постои, и дека тој е  „регионална форма на бугарскиот јазик“.

„Во Преспанскиот договор постои една одредба која се повикува на конференција на Обединети нации, не на некоја конференција организира тука меѓу нас, од 1979 година, во која македонскиот јазик е нормиран како еден од јазиците во јужнословенската група и е меѓународно признаен. Навистина сметам дека би било губење време да се убедуваме во нешто дали постои или не постои, исто како што македонската нација е факт и околу тоа никој нормален во нашата земја нема да дебатира и да потпишува договори со кој било“, рече Пендаровски.

Два дена по ставот на БАН дека македонскиот јазик е бугарски дијалект, официјална Софија пак преку амбасадорот во земјава, Ангел Ангелов, се огради од ставот на бугарските академици како официјален став на Бугарија.

„Мислам дека тука сме за друг повод, но официјалниот став на Бугарија е Декларацијата на парламентот. Така што, поофицијален став од тој нема“, вели Ангел Ангелов, амбасадор на Бугарија.

Премиерот Зоран Заев вели дека владата уште гради став каков тип реакција ќе упати до Софија.

„Рековме дека ќе реагираме, но сите реакции не се во делот на протестна нота, може да биде и во форма на повикување на амбасадорот“, вели Заев. 

Заклучокот на Бугарската академија следеше по Собранието на членовите на МАНУ кои на 3 декември усвоија Повелба за македонскиот јазик во која изнесоа научно признати факти за јазикот. Претходно пред два месеца бугарскиот Парламент донесе Декларација во која постави низа услови и закани за блокада на членството на Македонија во ЕУ, барајќи да не смее да се употребуваат поими „македонски јазик“ и „бугарски фашистички окупатор“.