ЗА ПОВЕЌЕ ОД ЕДНА ДЕЦЕНИЈА: Aлбанија ќе падне под еден милион

Добивај вести на Viber

Поранешниот албански претседател, Бујар Нишани, ги коментираше податоците изнесени од Институтот за статистика за бројот на албанското население. 

Вели дека Албанците се иселуваат на дневна основа заради несигурност, страв, непријателска средина и целосен недостиг од функционирање на државните институции.

Тој додае дека тенденцијата да се напушта земјата е уште повеќе очајна затоа што таа не е одраз само на неврабоеноста, кај посиромашното население, во селските средини, туку исто така и кај групите кои успеале со многу напори да достигнат среден економски стандард и нормален живот.

„Албанија го губи своето население! До 2030 ќе бидеме помалку од 1 милиони! Ако не ја запреме оваа ѓаволска спирала во 2040 година ќе бидеме веројатно само неколку стотина илјади“- изјави Нишани.

Албанија се соочува и со проблемот на намален број новороденчиња. Албанскиот Институтот за статистика – ИНСТАТ соопшти дека во второто тромесечје регистрирани се 5.592 новороденчиња. Од вкупниот број, најмногу од нив се родени во главниот град Тирана или 1.851 бебе, каде споредено со второто тромесечје лани бројот на новородените е помал за 22,2 отсто.

Според ИНСТАТ, во 2017 во земјата забележан е најмал број новородени деца по 1930 година кога албанската држава започна да прави попис на населението.

Според пописот спроведен во октомври 2011 година Албанија има 2.891.977  жители. Од вкупната попишана популација, со постојано место на живеење во Албанија се 1.421.810 жители, додека другите се со престој во странство до една година. Споредено со податоците од пописот во 2001 година бројот на вкупната популација е помал за 7,7 отсто, како резултат на емиграцијата и намалениот наталитет.