За прв пат Грција нема да не блокира некаде
Објавено во: Македонија 23 Февруари, 2018
Грција ја направи првата официјална отстапка која била договорена уште при средбата на премиерите Заев и Ципрас на Светскиот економски форум во Давос.
Затоа за прв пат по десетина години Грција нема да не блокира во зачленување во стратегијата на Европската Унија за Јадранско–јонскиот регион (EUSAIR), а дописот до комесарот за проширување и добрососедска политика Јоханес Хан веќе го испратил алтернативниот грчки министер за надворешни работи оргос Катругалос.
Од Министерството за надворешни работи на Грција потсетуваат дека во иницијативата се вклучени Грција, Италија, Словенија, Хрватска, Србија, Црна Гора, Албанија и Босна и Херцеговина, а соработка се реализира преку четири столба кои се однесуваат на синиот раст, односно растот во морските и поморските сектори, поврзувањето, односно транспорт и енергетика, животна средина и туризам.
Следниот знак на добра волја или симбол на градење доверба меѓу двете земји ќе биде грчката поддршка за вториот пакет на мерките од Спогодбата за асоцијација и стабилизација на ЕУ со Република Македонија иако секако од нивна страна и натаму ќе биде користена референцата ФИРОМ.
Од Македонска страна веќе беа повлечени имињата на меѓународниот автопат и аеродром кои го носеа името на Александар Велики, во Грција се гледа и остранувањето на споменикот на Ќосето, а се очекуваат и други гестови на дипломатијата кои покажуваат добра волја.