„За само 100 дена Владата ја закопа и последната надеж дека тука некогаш подобро ќе се живее“: Филипче со остра реакција за преговорите со ЕУ за членство
Објавено во: Македонија 26 Септември, 2024
Раздвојувањето на Албанија и Северна Македонија е тежок пораз на политиките на Владата на планот на европската интеграција на државата, но пред се, ова, како што кажа, е огромна катастрофа за иднината на граѓаните.
Ова го истакна денеска претседателот на СДСМ, Венко Филипче по информациите дека Албанија ќе продолжи со преговорите, додека нашата земја и понатаму останува во чекалната на Европската унија.
- За жал, оваа нова пропуштена шанса ќе се одрази на многу семејства и на уште една цела нова генерација. Ова ја убива надежта дека нашата држава може да напредува и да се развива. ВМРО-ДПМНЕ и Мицкоски на граѓаните им сервираа изборна измама. Преку куп лаги и манипулации тие се обидоа да ја затскријат вистинската намера.
А вистинската намера е дека ниту имаат план, ниту сакаат државата да напредува и да се развива во Европската Унија.
Велеа, планот ќе се соопштел откако ќе победат на изборите. Па еве денес, откако доживеавме тежок пораз, ги прашуваме, кој е планот?
Кои се роковите на планот ако воопшто го има? До кога ќе бидете фиктивна опозиција во државата и нема да преземете одговорност и чесно да кажете што ќе се случува со оваа земја? - праша Филипче на денешната пресконференција.
Според него „сега Македонија останува изолирана, без јасен план и стратегија како ќе продолжиме напред“.
- За само 100 дена владата ја закопа и последната надеж дека тука некогаш подобро ќе се живее. Осиромашена, безнадежна, внатрешно раскарана и раселена. Ова е планот на ВМРО ДПМНЕ за иднината на Македонија. Мицкоски ги блокира граѓаните и напредокот на државата додека сите на плаши од некакви идни блокади. Владата на ВМРО сака да се откажаме од плановите за евроинтеграции. Оваа е Влада која само се жали, бара оправдување и потикнува параноја - истакна Филипче.