За седум месеци поврат на ДДВ од 206 милиони евра
Објавено во: Финансии 20 Август, 2018
Над 206 милиони евра добиле фирмите од Министерството за финансии за седум месеци годинава по основ поврат на ДДВ, соопштија од Министерството. Велат дека оваа сума е за 24 отсто повеќе од истиот период лани или оваа година за истиот период се инјектирани 2,5 милијарди денари (40 милиони евра) повеќе во стопанството.
„Ова е значајна инјекција на ликвидни средства во стопанството, што овозможува непречено тековно работење на компаниите, но и ја поттикнува нивната инвестициска активност.Порано повратот на ДДВ беше горлив проблем во стопанството. Фирмите чекаа со месеци од државата да ги добијат парите кои им следуваат со закон. Во меѓувреме мораа да подигаат кредити и да плаќаат камати за да можат да работат и за да исплатат плати на вработените. Ова секако влијаеше и на нивната одлука да инвестираат понатаму во бизнисот“, велат од Министерството.
Нивните податоци покажуваат дека вкупната наплата на ДДВ годинава била подобра за 7,4 отсто во однос на минатата година во првите седум месеци.