Заев догодина очекува датум за преговори со ЕУ
Објавено во: Македонија 21 Јуни, 2017
Премиерот Зоран Заев во Софија изјави дека добиле искрени ветувања од источниот сосед за поддршка за почеток на преговори со Европската унија.
Бугарија ќе претседава со Унијата од 1-ви јануари наредната година.
„Македонија, покрај работата на внатрешен план и реформите што мора да ги направи во државата, се надева и на позитивен исчекор околу проблемот што Грција го има со нашето уставното име, надевајќи се дека навистина со новите перспективи што се отвораат во регионот ќе може да побараме, но и да добиеме и поддршка и помош од нашиот јужен сосед“- вели Заев.
Тој на есен очекува отстранување на условената препорака од Европската комисија, за догодина земјава да добие датум за отпочнување на преговорите. Заев се надева дека соседните земји искрено ќе ја поддржат Македонија за членство во ЕУ и во НАТО.
Тој со владина делегација е во дводневна посета на Бугарија.